താരങ്ങളേക്കാള്‍ വലിയ താരമായി സബായ്ന
രണ്ട് മാസം മാത്രം പ്രായമുള്ള സബായ്നയാണ് താരങ്ങളേക്കാള്‍ വലിയ താരമായത്. ക്യാമറക്ക് മുന്നിലേക്ക് പിറന്നു വീണ അവള്‍ അമ്മയുടെ കൈകളിലിരുന്ന് കണ്ണു ചിമ്മിയപ്പോള്‍ മുഖ്യമന്ത്രി ഉമ്മന്‍ചാണ്ടി പുഞ്ചിരിച്ചു. മന്ത്രി ഗണേശ് കുമാറും പ്രിയദര്‍ശനും ഭാഗ്യരാജും അടങ്ങുന്ന താരനിരയോടൊപ്പം അമ്മ ശ്വേതാമേനോനും നിറഞ്ഞ് ചിരിച്ചു. ഈ സമയം സദസിലെ ആയിരത്തില്‍ പരം കണ്ണുകളും അവളെ സ്നേഹത്തോടെ നോക്കി. വര്‍ണങ്ങള്‍ പെയ്തിറങ്ങിയ വേദിയില്‍ അമ്മയോടൊപ്പം അവാര്‍ഡു വാങ്ങാനത്തെിയ അവള്‍ വീണ്ടും മലയാള സിനിമ ചരിത്രത്തിന്‍െറ ഭാഗമായി.
സംസ്ഥാന ചലച്ചിത്ര പുരസ്കാരദാന ചടങ്ങില്‍ മികച്ച നടിക്കുള്ള അവാര്‍ഡ് വാങ്ങാനത്തെിയ ശ്വേതാമേനോന്‍െറ മകള്‍ സബായ്നയാണ് വേദിക്കും സദസിനും അരുമയായത്.അവാര്‍ഡ് ദാന ചടങ്ങിന് അരമണിക്കൂര്‍ മുന്‍പ് മകളേയും കൈയിലെടുത്ത് ശ്വേത വന്നപ്പോള്‍ ക്യാമറകളെല്ലാം തുടര്‍ച്ചയായി മിന്നി. ക്യാമറക്കു മുന്നിലേക്ക് പിറന്നു വീണ അവള്‍ ക്യാമകളെ തന്നെ ഉറ്റു നോക്കി. ഫോട്ടോഗ്രാഫര്‍മാല്‍ അവളുടെ ഓരോ ചലനവും ഒപ്പിയെടുത്തു. അവളെ ഓമനിക്കാനുള്ള തിരക്കായിരുന്നു മുന്‍നിരയിലിരുന്ന താരങ്ങള്‍ക്കും സിനിമപ്രേമികള്‍ക്കും. സ്നേഹ പ്രകടനങ്ങളുടെ ഇടക്ക് അവള്‍ എപ്പൊഴോ ഒന്നു കരഞ്ഞപ്പോള്‍ അമ്മ അവളെയും എടുത്ത് പുറത്തേക്ക് പോയി.
Comments
Post a Comment